موضوع خاص بالفضفضة

أبدأ أنا
-----
.....
أنا الطايش
انا الحلم اللي بيناغش
ف لقطة صدق ممسوحة
ومرمية
ف جنب طريق
أنا البحر اللي بيحاول
برغم الهوجة والزحمة ينجي غريق
أنا التفريق.....
بيجمعني
وكل ملامحك السودة
علي الموضة
بتوجعني
أنا المعني
ف نطق الأهة والدمعة
منيش شمعة
ف ركن بعيد ومش باين
أنا الكاين
ف كل بروز
ونفس وريدك الدامي
بيرميني
وينزفني
أنا اللي عارفني ..
من بدري ...
مواطن من بلد تالت
أنا الفالت ...
عشان أضحك
رمانى الضحك
ولقيتك
*-*

فرح ماشي ف حضن ذكري
خوف بيحجز حزن بكره
جيت لقلب الدنيا مكره
نفسي اسيبها بإختياري
..
وانسي كل حكايه بايخه جالها أمر الوالي تنزل منا ف هبوط إضطراري

مـتأكد
إن الشمس هتعزم صوتك
علي كوباية نور
والأحلام هترش الغلة لطير النخل
الترعة المخنوقة بورد النيل ..هتغنى
ويردد وياها الغيط
الخيط الفاصل بين النور والعتمة يبان
والألوان
هتعاود ليك
شوف بعنيك...
راح تلقي براح
باب الخنقه معدش متاح

البحر بيتحاسب
علي كل حالة غرق
مكنتش مقصودة
...
رغم إنه أخر وجع ف الأهة بيحسه
...
والشمس لما بتنضرب
م الشباكين بتخاف
ف بتهجر الأوضه
...
والخلق بيبصوا
...
والموضة ان الوطن يكفي الولاد الشر
ويقولهم شبيك راح نمنع الموضه
...
يلا بقي إترصوا
...
سيلفي الشجن
مسموح

الخوف بيضرب بانجو ويسخف عليك
والقلب طفاية وجع مش قابلة ضيف

ومن مده
مقولتش ليكى بهواكي
وسايب سكتى تحدد خطايا بعيد
وحيد الضحك من غيرك
ف قلب وحيد
ومن مده انا

خابر ..
إن خيوط الحزن السوده ف عقدة روحك عاقده النور

الصدفه
بتوقف اشارات المرور
وبتفتعل زحمة

مبقاش البحر بيطبطب ولا يرطب
بيجي الحزن ويحطب
مع النبضة

وقلبك هش
وحلمك قش
دا شايب قش
ف مات الشب م الخضه

اخرس يا ولد وعيش
فتفت غناك بشويش
مين اللي داق العيش
واتمز بغموسه
طبع الغلابة يدوب
تصبر علي المكتوب
مطلوب تبات مغلوب
وكله بفلوسه
ومتشغلوش البيه
وطى وحب إيديه
عمل اللي قلنا عليه
اسم الله ننوسه

اخرس يا ولد وعيش
فتفت غناك بشويش
مين اللي داق العيش
واتمز بغموسه
..
لكن يا ولد الخال - طلق الوطن زلزال- قادر يهد جبال- والجرح هيدوسه
..
طبع الغلابة يدوب
تصبر علي المكتوب
مطلوب تبات مغلوب
وكله بفلوسه
..
ماتقولي طيب كيف - أسكت لجز السيف - صبرك بيطرح زيف - وانت اللي محبوسه
..
ومتشغلوش البيه
وطى وحب إيديه
عمل اللي قلنا عليه
اسم الله ننوسه
...
خلا المعيشه براح - والحر طير صداح - ف اليم ميت ملاح - والموجه بتبوسه

واما روحك تيجي روحي
بابقي شاعر

سنتشارك في كسرة الخبز
وف الغطاء
والمأوي

سر في طريقك يا صديق ولا تسل
إن الإجابة إن أتتك فلن تريح
تاريخك المنسوخ من ظل القبل
لن يمتطيه سوي المخنث والكسيح

متوزنشي
وعيش عادى
طريقك فجر مش مرصوف
فحاول ترمي أحمالك علي كتافك وتبدأ فيه
ودندن ويا دقاتك وشوف الساعه غنيها وكون بحار
غنى البحار مونس ناس علي الشط البعيد ساكنه
كمنجة بوح بترمي الروح
لناحية بجد مش تقليد
أمانه تعيد ..
أواخر ضحكة جاتلك يوم
وكنت عريسها مش محروم من الفرحة
متوزنشي
وقوم إمشي
وشيل عن دنيتك طرحة
وإفرد خمسة اليمني
بعزم مافيك
وفوقها ...

عيونك سيوف لسه قاسمة النجوم
وصوتك حكايه بتروي القمر
يجوز الدقايق بتطرح هموم
يدوبها ضحكك في لحظة سهر
بحبك
برغم ابتسام الشجون
ورغم الشحوب اللي غاوي الحياه
بحبك وسارح ف وادي العيون
وقلبك خريطه بألف اتجاه

وهاتلي يا صاحبي بالباقي سعادة بلاك
يجوز القهوة تتصالح مع الفنجان
ف يضحك وشها الرايق
ويستناك

متشنكله
كام حاجة فيك
لسه السكك متعورة من كام رصيف
نص الغبار سد طريق
والباقي بيعفر بناس
الأرض ....
بتطلع لسانها لكل شئ
والمغرمين بالعيشه ع الكوكب خلاص
جالهم قرار الحزن
بالبوح والعماله

بأصبر ونا عارف إن المقدر كان
دا القلب مش هيبيع أو يطرد السكان
الصورة ضحكة ليل بيزفها بركان
ونا مستعد أعيش
مهما التقانى غروب

يا مهزوزين الوسط والجته
دام الوطن بيكم ودام عزو
الحلم أصبح خمسميت حته
وانت إحترفتوا
وبس
بتهزوا

ارتجاج المخ

متشنكله
كام حاجة فيك
لسه السكك متعورة من كام رصيف
نص الغبار سد طريق
والباقي بيعفر بناس
الأرض ....
بتطلع لسانها لكل شئ
المغرمين بالعيشه ع الكوكب خلاص
جالهم قرار الحزن
بالهجرة
..

ياللي واهبة العمر نسمة
نظرتك للدنيا ...رسمه
سيبي قلبي جوي بسمه
من عنيكى
واحضنيه

العتمة أوسع من ضيا مشروط

متشنكله
كام حاجة فيك
لسه السكك متعورة من كام رصيف
نص الغبار سد الطريق
والباقي بيعفر بناس
الحلم....
بيطلع لسانه لكل شئ
المغرمين بالعيشه ع الكوكب خلاص
جالهم قرار الحزن
بالهجرة
..
يا نجمع الأجرة